برج حمل: آج اپنے وعدوں کی پابندی کے علاوہ اپنے مالی حالات کے استحکام کی جانب آپ کی توجہ ہو سکے گی جس سے آپ متحرک اور جوشیلے ہوسکتے ہیں۔اس کے علاوہ کسی رکاوٹ کے سامنے آ نے سے آپ کا رویہ تلخ بھی ہو سکتا ہے ۔ ماضی میں کئے گے فیصلے آپ کے سامنے آنے سے جذباتیت نمایاں ہو سکتی ہے جسکی وجہ سے طبیعت میں بد مزگی واضح ہو سکتی ہے۔ اس کے علاوہ اپنی چھٹی حس سے فائدہ اٹھا کر اپنے اہداف کی تکمیل کر سکیں گے اور اپنے آپ کو پر سکون رکھ کر اپنی کامیابی کی جانب اپنا سفر اعتماد سے شروع کر سکیں گے ۔آج اپنے ارادوں کی استقامت اور اعتماد کی وجہ سے محسوس ہوگا کہ آپ کسی بھی کام کو سرانجام دینے کی طاقت رکھتے ہیں۔
برج ثور : آج اپنے تمام تر مسائل کو حل کرنے اور اپنی کاروباری حالت کو بہتر بنانے کے لئے صرف اپنے پاس موجود رقم پر ہی انحصار کریں۔کسی سفر کا ارادہ فی الحال ترک کر دیں۔اگر آپ یہ سمجھ رہے ہیں کہ کوئی غیبی قوت آ کر آپ کے مسائل کو حل کر دے گی یا دوسروں کی پید اکردہ مشکلات سے نجات حاصل کرنے میں آپ کی مدد کرے گی تو اپنی اس سوچ سے جان چھڑائیں۔دوسروں کی طرف دیکھنے کی بجائے خود کو اعتماد کی قوت سے مالا مال کرکے ہی آپ خفیہ زنجیروں کو توڑنے میں کامیاب ہو سکیں گے۔ ایسی باتیں بہت آسان نظر آتی ہیں مگر ان کی تہہ تک پہنچ کر ہی علم ہوتا ہے کہ اصل رکاوٹ کہاں ہے اور اس کی وجہ کیا ہے؟
برج جوزا : آج بہت سے نئے کاروباری منصوبے بنانے کا موقع مل سکے گا جبکہ آپ اپنی استطاعت سے زیادہ متحرک ہونے میں بھی کامیاب ہو سکیں گے۔کاروبار کو منافع بخش بنانے کی کوششیں کارگر ثابت ہو سکیں گی۔دوسروں کے بارے میں اپنی ذاتی رائے کے کھلم کھلااظہار سے گریز کریں اگر آپ نے ایسا کیا تو یقین کر لیں کہ آپ کے سامنے غصے اور تلخیوں کے پہاڑ کھڑے ہو جائیں گے۔اسکے علاوہ آپکے ذاتی منصوبے رکاوٹوں کا شکار ہو جائیں گے یعنی آپ کا کوئی بھی کام بہتر او رمناسب طریقے سے حل نہ ہو سکے گا۔ زندگی گزرنے کیلئے کوئی اچھوتا خیال اور نیاآئیڈیا سامنے آنے سے بہترین عمل کی راہ ہموار ہو سکے گی مگر غصہ پر قابو پانا بہت ضروری ہوگا۔
برج سرطان: آج آپ کو اپنے جاری منصوبوں سے مثبت نتائج حاصل کرنے میں کامیابی ہو سکتی ہے۔ دوسروں کے مفاد کی جنگ لڑنے سے گریز کریں کیونکہ ایسے کاموں میں اپنے مفادات کا نقصان کرنا پڑتا ہے وقت بھی ضائع ہوتا ہے اور دوسروں کے مقابلے میں آکر خواہ مخواہ کی دشمنی مول لے کران کا ٹارگٹ بھی بننا پڑتا ہے۔ موجودہ زمانے میں دوسروں کو سمجھانا اور ان کی راہنمائی کرنا وقت کا ضیا ع ہے۔مختصر یہ کہ منزل کے حصول میں کامیابی کے لئے مستقل مزاجی سے اپنا سفر جاری رکھیں ۔خود کو سست اور لاپرواہ بنانے سے گریز کریں۔ خود کو تنگ کر کے لطف اندوز ہونا کسی طرح بھی عقلمندی کی علامت نہیں ہے۔
برج اسد: آج اپنے معاملات کی انجام دہی میں انتہائی سنجیدگی کا مظاہرہ کرنا ہو گا کیونکہ آج کا دن اپنے اہداف کی تکمیل اور منزل کے حصول میں بہت مددگار ثابت ہو سکتا ہے۔اپنے گفتگو سے دوسروں کا دل جیتنے کی کوشش کامیاب رہے گی جبکہ کسی بھی جذباتی ہیجان سے نمٹنے کے لئے بہترین صلاحیتوں کو آزما سکیں گے۔لیکن پھر بھی اگر کسی بھی طرح کا کوئی اختلافی مسئلہ سامنے آ جائے تو اس پربحث ومباحثہ سے گریز کریں ورنہ تلخی پیدا ہوکر آپ کو دلبرداشتہ بنا سکے گی ۔اپنے آئیڈیل کی تلاش میں ناکامی کامطلب دوسروں سے تلخی نہیں ہونا چاہئے۔اپنے اردگرد رونما ہونے والی تبدیلیوں پر توجہ دے کر اپنے جاری منصوبوں کو مکمل کرنے میں کامیاب ہو سکیں گے۔
برج سنبلہ: آج اپنے کاروبار کے بارے میں تشویش کے علاوہ شکوک و شبہات بھی پیدا ہو سکتے ہیں جبکہ آپ کا کوئی قابل اعتمادوست آپ سے دھوکہ کرکے آپ کی رقم پر ہاتھ صاف کر سکتا ہے۔اپنے وجدان پر بھروسہ رکھیں اور کسی وہم کو پالنے سے بچیں۔ اسکے علاوہ اپنی ذاتی رائے کو دوسروں پر تھوپنے کی کوشش مت کریں مبادا باہمی اختلافات کا آغاز نہ ہو جائے۔آج بہت سے مالی معاملات آ پکی توجہ کے طالب ہونگے۔ ایک غیر متوقع کاروباری سمجھوتہ طے ہو سکتا ہے۔ کسی بھی معاملے پر اپنے پارٹنر یا شریک حیات سے تکرارنہ کریں ورنہ اسکی دل شکنی ہو سکتی ہے ۔آج کوشش کر کے غلط فہمیوں کو جنم دینے سے بچیں اور کسی بھی مشکل صورتحال میں خود کو ملوث نہ ہونے دیں۔
برج میزان: آج کسی جائیداد یا پراپرٹی کے لین دین میں مصروف ہونے کی وجہ سے بے آرامی یا تھکاوٹ ہو سکتی ہے۔کچھ خفیہ رکاوٹیں پیدا ہونے کی وجہ سے مشکلات کا احساس ہو سکتا ہے لیکن پریشان نہ ہوں کیونکہ آپ باآسانی ان مشکلات پر قابو پا سکتے ہیں۔اپنے اخراجات پر قابو رکھیں ورنہ آپ کا بجٹ خراب ہو سکتا ہے۔ کسی دوست کی عملی مدد حاصل کرنے کے بعد آپ اپنے معمولات کو آگے بڑھا سکیں گے۔اپنی زندگی کی حقیقتوں کو سمجھنے کی کوشش ہی آپ کی بہترین کامیابی ہے ویسے آپ کو دوسروں کے سامنے کسی بھی طرح کا دکھاوا کرنے کی ضرورت نہیں ہے۔ اپنے حقوق کے حصول میں کامیابی کیلئے خود کو متحرک کر نے کی کوشش کریں۔
برج عقرب: آج اپنے موجودہ مسائل کے حل میں مکمل توجہ سے ہی آپ کوکامیابی مل سکے گی اور اس کا اثر آنے والے دنوں میں بھی صاف نظر آسکے گا۔ خاص کر کسی سفر کا ارادہ کرنے اور کسی قسم کے امتحان میں شمولیت کے لئے آپ کا دن بہترین ثابت ہوگا۔محبت کے حصو ل میں کامیابی کے لئے آپ کو اپنی سوچوں کو بدلنا ہو گا ۔اپنی مالی کامیابی کے لئے اپنے ساتھیوں سے مشاورت کریں اورمیل ملاقات کے بعد ان سے فوائد حاصل کرنے کی کوشش کامیاب بنا لیں۔ آپ کی تلخ مزاجی کی وجہ سے کئی ایک معاملات درست نہیں ہو رہے۔اپنے موجودہ مسائل سے نجات حاسل کرنے امکانات کو روشن کرنے کی کوشش کریں۔ آج اپنے احساسات کا اظہار بخوبی کر سکتے ہیں۔
برج قوس: آج کہیں سے معقول رقم کی وصولی آپ کے بجٹ کو متوازن بنانے میں مددگار ثابت ہو سکے گی۔اس کے علاوہ اپنے یاروں دوستوں کے ساتھ کسی پارٹی میں شمولیت ہو سکے گی جبکہ اپنے آرام کا خیال رکھنا بھی بہت ضروری ہوگا ورنہ آپ کا ذہن کسی بھی مسئلے میں الجھن سکتاہے۔ جبکہ فرارکے راستے پر سفر کرنا آسان نہ ہو گا کیونکہ اپنی ذمہ داریوں کو نظر انداز کر کے بھاگنے کا ارادہ ٹھیک بات نہیں ہے۔ اختلافی نقطہ نظر کی وجہ سے آپ کی تخلیقی صلاحیتں ابھر کر سامنے آنے سے مد مقابل کو جھٹکا لگ سکتا ہے۔ اپنے رویے کو اتنا مثبت رکھیں کہ آنے والے دنوں کے حالات کی بنیاد مضبوط بنا سکیں اور خاص کر ذاتی معاملات کو آسان لیں۔
برج جدی: آج اپنے مسائل کو حل کرنے کے لئے سب سے پہلے اپنی سوچوں کو مثبت بنائیں اور کسی قسم کے اندیشوں اور خدشات کو حاوی نہ ہونے دیں ۔اپنے کام کے دوران کسی پیچیدہ صورتحال کو سلجھانے کی وجہ سے اپنے سینئرز کی جانب سے شاباش مل سکتی ہے۔اگر بات اپنی ذات کی آجائے توکسی بھی مخلص فرد سے مشاورت کر کے اپنے مسائل کاحل تلاش کیا جا سکے گا۔ جب حقوق کی بات ہو گی تو یقینی طور سے آپکی ذات سامنے رہے گی ۔خود کو اپنی ذاتی رائے پر قائم رکھیں اور دوسروں کی رائے کو سننے میں بھی دلچسپی کا اظہار کریں مگر اپنی خواہشات کے مطابق تمام فیصلے آپ کو سکون نہ دے سکیں گے جبکہ حالات میں بغاوت کا عنصر سامنے آ سکتا ہے۔
برج دلو: آج اپنے اہداف کے حصول کے لئے آپ بہت زیادہ پرعزم اور پرجوش ہوں گے جس کی وجہ سے آپ کا بجٹ بھی ترقی کر سکتا ہے۔اپنے دوستوں سے ملاقات کا وقت نکانا ہوگا کیونکہ اس کے بغیر اپنے آپ کو پرسکون بنانا آپ کے لئے دشوار ہوگا۔لیکن بہت سے افراد آپ سے توقعات وابستہ کئے بیٹھے ہیں جنہیں پور ا کرنے میں آپ کو سخت محنت درکار ہو گی کیونکہ دوسروں کی خوشی آپ کی محنت اور آمدنی سے مشروط ہوسکتی ہے۔اپنے کاموں کے بارے میں دوسروں کی تنقید کو خاطر میں نہ لائیں ورنہ کئی مسائل ایک دم سے حملہ آور ہوکر آپ کا ضبط ختم کر سکتے ہیں ۔آپ کو جس قدر سکون اور تحمل کی آج ضرورت ہو گی پہلے کبھی نہ تھی۔
برج حوت: آج مستقبل کے بارے میں کسی بھی فیصلے کو اپناتے وقت حقیقت پسندانہ رویہ اختیار کریں کیونکہ سچی خوشی کے حصول کیلئے اپنے اور دوسروں کے نقطہ نظر میں موجود کسی بھی طرح کا اختلاف ختم کرکے ہی منزل کی جانب سفر طے ہو سکے گا۔اگرآج کوئی رکاوٹ پیدا ہوگی تو اس کا ذمہ دار صرف حالات کو ہی ٹھہرایا جائے گا۔اپنے مستقبل کی ذمہ داریوں کے بارے میں مستقل اورمثبت فیصلہ کرنے کے لئے خود کو تیار کر لیں کیونکہ جب بھی آپ ایسا کرنے کے لئے آگے قدم بڑھانے کی کوشش کریں گے تو آپ کو نئی کامیابیاں ملنا شروع ہو جائیں گی۔ بہت سے نئے مواقع آپ کے لئے تیار ہیں مگر ضرورت ہے تو صرف اور صرف آپ کی ہمت اور قوت فیصلہ کی ۔
