دوسری تاریخ کی دعا (تمام)

شروع اللہ کے نام سے جو بہت مہربان اور نہایت رحم کرنے والا ہے تمام تعریفیں اسی خدا کے لئے زیب دیتی ہیںجِس نے اپنے بندِئہ خاص پر کتاب نازل فرمائی، اور اس کے لئے کوئی کجی نہیں رکھی وہ بالکل استوار ہے، تاکہ اس ذریعے سے لوگوں کو انتہائی غضب سے ڈرانے اور ان مومنوں کو جو نیک عمل کرتے ہیں یہ بشارت دے ۔ کہ ان لوگوں کو اچھا صِلہ ملے گا اور اسی میں انہیں ہمیشہ رکھا جائے گا۔ اور ان لوگوں کو ڈرائے جو کہتے ہیں کہ اللہ نے اپنا فرزند بنایا ہے۔ نہ ان کو کچھ علم ہے نہ ان کے آباؤاجداد کو، ان لوگوں کے منھ سے بہت بڑی بات نکلی ہے، یہ سوائے جھوٹ کے کچھ نہیں کہتے۔ اس اللہ کی تمام تعریفیں جس نے ہم سے رنج کو دور کردیا، بلا شُبہ ہمارا پروردگار ضرور ضرور بہت بخشنے والا ہے ۔اور وہی وہ قدردان ہے جس نے ہمیں اس قیامگاہ میں جگہ دی جس میں ہمیں نہ تو تھکن ہوگی نہ کوئ زحمت دامن گیر ہوگی۔ ہر طرح کی حمد اللہ کے لئے زیبا ہے ۔ اور اللہ کی سلامتی ہو اُسکے ان بندوں پر جسے اُس نے چُنا ۔ بھلا اللہ بہتر ہے یا وہ لوگ جسے یہ لوگ اس کا شریک مانتے ہیں، وہ کون ہے جس نے آسمان و زمین کو پیدا کیا ۔ اور تمھارے لئے آسمان سے پانی برسایا پھر ہم نے اس کے ذریعے فرحت بخش باغ پیدا کئے، تمہارے لئے تو یہ بھی ممکن نہ تھا کہ زمین کے درخت اُگا سکتے ۔ کیا اللہ کے ساتھ اور بھی معبود ہیں؟ (نہیں) بلکہ یہ قوم حق سے برگشتہ ہے۔ کون ہے جس نے زمین کو قرار بخشا، اور اس کےاندر نہریں بہائیں ۔ اس کے لئے میخین (پہاڑیاں )لگائیں سمندروں کے درمیان رکاوٹیں خلق کیں ، کیا اللہ کے ساتھ اور بھی معبود ہیں؟ (نہیں) بلکہ اکثر نا واقف ہیں ، وہ کون ہےجو بے چین کی پکار کے وقت لبیک کہتا ہے اور پریشانیوں کو دور کرتا ہے ۔ اور تمھیں زمین پر گزشتہ امتوں کاوارث بناتا ہے؟ کیا اللہ کے ساتھ اور بھی معبود ہیں؟ (ہر گز نہیں مگر)اس حقیقت کو بہت کم لوگ جانتے ہیں ۔ وہ کون ہے جس نے خشکی و تری کی تاریکیوں میں تمھاری رہنمائی کی ۔ اور وہ کون ہے جس نے ہواؤں کو تمھارے لئے اس کی رحمتوں کی خوش خبری پہنچانے والا بنایا ؟ آیا اللہ کے ہوتے ہوئے بھی کچھ معبود ہیں؟ اللہ ان لوگوں کے خیالِ شرک سے پاک و بلند ہے ۔ اچھا وہ کون ہے جو تمھیں آسمان و زمین سے روزی دیتا ہے ۔ کیا اللہ کے ساتھ اور بھی معبود ہیں؟ (نہیں) ان سے کہو کہ اگر سچے ہو تو کوئی دلیل لاؤ ان سے کہو آسمان و زمین میں غیب کا علم کسی کو نہیں ۔ اور نہ انہیں یہ خیال آ سکتا ہے کہ کب دوبارہ زندہ کئے جائیں گے ۔ اس اللہ کی حمد جو آسمان و زمین کا خالق بے مثال ہے۔ اس نے فرشتوں کو قاصد بنایا کہ جن کے دو دو، تین تین، چار چار، بازو ہیں وہ جس کی تخلیق میں چاہتا ہے اضافہ کرتا ہے بلاشبہ اللہ ہر چیز پر قادر ہے ۔ اس اللہ کی حمد جو بخشنے اور بہت معاف کرنے والا ، محبت کرنے والا ، توبہ ماننے ، بہت عطا کرنے والا، بہت بلند، سننے اور دیکھنے اور جاننے والا ہے ۔ بے نیاز ، زندہ و برقرار رکھنے، جبروت رکھنے والا، ہے، (وہ ) حقیقی بادشاہ، صاحبِ اقتدار ، قادر، صاحبِ ملکیت، حق، روشن، بلندو بلندتر ، سرفراز، اوّل، آخر، باطن و ظاہر ہے۔ جس کی انتہائی تعریف کی جا چکی ، ہر ایک کی مدد کرنے والا، بہت بڑا خالق ، آفریدگار و موجد، ہر شے کو شکل عطا کرنے والا، صاحبِ غلبہ ، اصل نیکی، قدردان و شکر شناس، کارساز و سربراہ، ہر شے کا مشاہدہ کرنے والا، مہربان، نگہبان، کشائش عطا کرنے والا، صاحبِ علم ، صاحبِ کرم، قابلِ تعریف، صاحبِ جلالت، گناہ بخشنے والا، توبہ قبول کرنے والا، بادشاہوں کا بادشاہ، غائب و حاضر کا عالم، برقرار و صاحبِ کرم ، کائنا ت کا پروردگار۔ اس اللہ کی حمد جس کی حمد بھی عظیم ہے اور عرش بھی۔ملک بھی بڑا اور قوت بھی ، بردباری بھی بڑی اور کرامت بھی، رحمت بھی عظیم آزمائش بھی عظیم، نور بھی بےحد اور فضل بھی ، عزّت بھی بہت اور کبریائی بھی عظیم، جبروت بھی عظیم، شان بھی سب سے ممتاز اور حکم بھی عظیم۔ کائنات کا پروردگار پاک و پاکیزہ ہے۔ صاحبِ برکت ہے۔ وہ اللہ جوہر چیز سے عظیم ہر شےزیادہ با اقتدار،ہر چیز سے زیادہ بلند ، ہر ایک سے زیادہ مہربان، ہر شے سےزیادہ بہتر۔کائنات کے پروردگار معبود کی تمام تعریفیں۔اس اللہ کی تمام تعریفیں جو بزرگ و برتر، مہربان و رحیم، صاحبِ اقتدار و حکمت، ہر چیز کا خالق۔ ہر ایک سے باخبر،حقیقی بادشاہ، انتہائی پاکیزہ، صاحبِ جلالت و کبریائی، صاحبِ رفعت و عظمت ہے۔صاحبِ بزرگی و جبروت، صاحبِ غلبہ، جنّت و دوزخ کا مالک، کبریائی و جبروت صرف اسی کے لئے ہے۔ اسی کا حکم ہے۔ اور (حمد و ثناکی) اچھی باتیں اسی کی بارگاہ میں باریاب ہوتی ہیں۔ اور نیک عمل کو وہی بلندی دیتا ہے۔ تجھے اپنی رحمت کا صدقہ اےمہربانوں میں سب سے بڑے رحم کرنے والے۔